ကျမ ဝယ်ရန်ရည်ရွယ်ထားသော

ကျန်ခဲ့တဲ့ တစ်လလုံး သင်တန်းမှ ပြန်သည့်ညနေတိုင်း ကျမသည် ဒီနေရာကိုဖြတ်လျှင် လှည့်မကြည့်ဘဲ မနေနိုင်..

ခရေဇီစိမ်းလို့ ခေါ်သည့် အစိမ်းနုနုတောက်တောက်ရယ် အပြာဖျော့ဖျော့ရယ်ကို အနက်ရောင်၊ မီးခိုးရောင်လိုင်းကွပ်လေးများဖြင့် အဆင်ပြေပြေ တွဲစပ်ထားသည်က တော်တော်လေးကို သဘောကျစရာကောင်းသည်.. ကျောပိုးအိတ်များ သီးသန့်ရောင်းသည့်ဆိုင် မဟုတ်သဖြင့် ဒီဇိုင်းများများလည်း မရှိ.. အမျိုးစားများများလည်း မရှိသည့် စတိုင်းဆိုင်လေး၏ ရှေ့ဘက်မျက်နှာစာမှာ ထိုအိတ်ကလေးကို အမြဲ ချိတ်ဆွဲလျက်သားမြင်ရတတ်သည်.. အဲ့သည့် ကျောပိုးအိတ်လေး ကျမကြိုက်တယ်..

ကျမ လက်ရှိလွယ်နေသည့် ကျောပိုးအိတ်အစိမ်းလေးက တော်တော်ဟောင်းနွမ်းနေပြီ.. အနက်ရောင် လက်ပ်တော့ထည့်လွယ်ရသည့် ကျောပိုးအိတ်ကတော့ နေရာတိုင်းကို မလွယ်ချင်.. သိပ်သဘောကျမိသော အပြာရောင်လေးတစ်အိတ်လည်း ရှိသေးပေမယ့် ကျမ ချစ်သူက ထိုအပြာရောင်ကျောပိုးအိတ်ကို ကြည့်မရဘူးဟု ဆိုသည်.. ရှုပ်ရှုပ်ပွပွနဲ့ အပေတေဆန်တယ်ဟု သူက အကြောင်းပြ၏.. ထိုအိတ်များအပြင် တခြားတခြား ဘေးလွယ်အိတ်တွေ တစောင်းအိတ်တွေ များစွာရှိသော်လည်း ကျမက ကျောပိုးအိတ်ကိုသာ မက်မက်စက်စက်တွယ်တာသူ တစ်ယောက်ဖြစ်လေတော့ လမ်းသွားရင်းလာရင်း ဆိုင်တွေမှာ ပြထားသည့် ကျောပိုးအိတ်များကို အလွတ်မပေးဘဲ ကြည့်တတ်သည့် အကျင့်က ကျမမှာ ရလာတော့သည်..

ကျမသည် ကျောပိုးအိတ် မလွယ်ထားရလျှင် မလုံခြုံဘူးဟု ခံစားရသူများထဲမှာ တစ်ယောက်အပါအဝင်ဖြစ်ပါသည်.. ကျောပိုးအိတ်ထဲမှာ ပိုက်ဆံအိတ်ကလွဲလျှင် ဘာမှ မပါဘဲ လွယ်ထားရသည်ဖြစ်စေ၊ စာအုပ်တွေ အခွေတွေ ပစ္စည်းပစ္စယတွေ တပုံတပင်နှင့် လေးလေးလံလံ လွယ်ထားရသည်ဖြစ်စေ.. ကျောပိုးအိတ်ကို ကိုယ်နှင့်မခွာ ဆောင်ယူတတ်သူဖြစ်၏.. တခါတရံ ကျမချစ်သူက "ဘာမှ မပါဘဲ ဘာလို့ ဒီအိတ်ကိုလွယ်လာသေးတာလဲ"ဟု မျက်မှောင်အတွန့်ချိုးလျက် အလိုမကျသလို ဆိုတတ်သေးသည်.. ထိုအခါမျိုးတွင် ကျမ ပုခုံးတွန့်လျက်သာ ပြုံးနေလိုက်ပါသည်.. ကျောပိုးအိတ်မပါရင် ကျောမလုံဘူးဟု ဖြေရှင်းလျှင်လည်း သူက နားလည်ပေးနိုင်မည်မဟုတ်..

ကျမ ချစ်သူနှင့် ကျမသည် ကျောပိုးအိတ်ကိစ္စမှာတင်မက နေရာတော်တော်များများမှာ အမြင်ချင်း သဘောထားချင်း မတူညီတတ်ကြ.. အစားအသောက် ကြိုက်တတ်တာခြင်း မတူ.. ကျမစားသလို သူမစားချင်.. သူစားတာ ကျမ မကြိုက်.. နေတာထိုင်တာခြင်းမတူ.. အဝတ်အစား စတိုင်ကြိုက်တာခြင်းမတူ.. ရုပ်ရှင် စာအုပ် စသည်တို့ ကြိုက်သည့် အမျိုးအစားများ မတူ.. သို့သော် ဘာကြောင့်များ ကျမတို့ သိပ်ချစ်ကြသည့် ချစ်သူတွေ ဖြစ်လာပါလိမ့်.. ချစ်သူချင်းဖြစ်သဖြင့် အတူလုပ်ကိုင်ရသည့် ကိစ္စတိုင်းတွင် ကျမက သူ့အကြိုက်ကို လိုက်လျောခြင်းအားဖြင့် ကျမတို့ ပြေလည်စွာ တွဲစပ်နိုင်ခဲ့ခြင်း ဖြစ်မလား.. သေချာတော့ ကျမ မသိ.. ဒီကျောပိုးအိတ်လေးကို ဝယ်ဖို့ နှောင့်နှေးနေသည့် အကြောင်းရင်းထဲတွင် သူမကြိုက်သဖြင့် ဆိုသည့် အကြောင်းပြချက်လည်း ပါနေတာတော့ အသေအချာပဲ..

တညနေ ကျမနှင့် သူ အတူတူ ထိုဆိုင်ရှေ့ရောက်တော့ သူ့လက်ကိုအတင်းဆွဲလျက် ထိုကျောပိုးအိတ်လေးကို ဝင်ကြည့်ဖြစ်ကြသည်.. ကျောပိုးအိတ်က ပျော့ပျော့အိအိနှင့် ခပ်အေးအေး .. မိုးကာသားလို့ ခေါ်မလားမသိ.. ရေအလွယ်တကူ မစိမ့်ဝင်နိုင်သည့် အစဖြင့် ချုပ်ထားသည်.. ချုပ်ရိုးချုပ်သားလည်း သေသပ်ကောင်းမွန်းသား.. သိပ်မကြီးလွန်း မသေးလွန်း.. ပြီးတော့ ကျမ အကြိုက် အိတ်အကန့် ၂ အိတ်ပဲ ပါသည့်စတိုင်မျိုး.. ဈေးနှုန်းကလည်း ၇ ထောင် ဆိုတော့ လိုချင်နေသည့် ကျမအတွက်တော့ တန်သည်ပေါ့.. သို့သော် သူကတော့ မကြိုက်ဟု ကန့်ကွက်သည်.. အရောင်ကလည်း ကြောင်ကြောင်ကြီးဟု ဆို၏.. အပေါစားဆန်တယ်ဟုလည်း ဝေဖန်၏.. "ခု ဝယ်မှဖြစ်မှာမှ မဟုတ်တာ.. တခြားကြည့်ပါဦး.. ပိုက်ဆံနည်းနည်းထပ်ဖြည့်ပြီး အကောင်းစားဝယ်တာမဟုတ်ဘူး.. ကလေးမဟုတ်ဘဲ ဒါမျိုးတွေက ကြိုက်တုန်းပဲ"ဟု ချော့သလိုလို တားမြစ်ခဲ့သည်.. ထိုအခါ ကျမသည် အိတ်ကလေးကို အရောင်းစာရေးကောင်မလေးထံ ပြန်ပေးရင်း တွေဝေပြန်၏..

ထိုသို့ဖြစ်သည်မှာ ဒီတစ်ခါထဲလည်း မဟုတ်.. သူသည် သူ မကြိုက်သော ကိစ္စတစ်ခုကို မလုပ်ဖို့တားမြစ်ရာတွင် အဟုတ်ပင် တော်သူဖြစ်လေတော့ နဂိုကတည်းက ဆုံးဖြတ်ချက်မခိုင်မာတတ်သူ ကျမကို သူ လွှမ်းမိုးနိုင်သည်မှာ အံ့သြစရာတော့လည်း မဟုတ်ဘူးထင်သည်.. ချော့ပြော ချောက်ပြောနည်းများအပြင် ခြိမ်းခြောက်သည့်နည်း.. အစားထိုးသည့်နည်း.. နည်းပေါင်းစုံ သူ သုံးတတ်သည်.. သို့သော် သည်လိုမျိုးက မကြာခဏ ဖြစ်လာတော့ ကျမ အတ္တကို ထိခိုက်လာလေသလားမသိ.. ကျမသည် သည်းခံနိုင်စိတ်နည်းပါးလာ၏.. အလျှော့ပေးရပါ များလွန်းတော့ ပွန်းပဲ့လာသည် ထင်၏.. သိမ်ငယ်ရသည် ထင်လာသည်.. ကျမသည် တခါတရံ သူ့ကို မျက်နှာချင်းဆိုင်ချင်စိတ် မရှိချေ..

သူက တားမြစ်သဖြင့် မဝယ်ရဘူးလိုလို ဝယ်ရမယ်လိုလို ကျမ ချီတုံချတုံဖြစ်နေခဲ့တာ ရက်တွေတောင် တော်တော်ကြာခဲ့ပြီ.. ထိုဆိုင်ရှေ့ကဖြတ်တိုင်းတော့ အိတ်ကလေးကို လှည့်ကြည့်တတ်စမြဲပင်.. ဒီနေ့တော့ ကျမသည် ဆိုင်ရှေ့ကဖြတ်ပြီး ကျောပိုးအိတ်ကလေးကို လှည့်ကြည့်ခဲ့ပြီး ဘတ်စ်ကားပေါ် တက်ခဲ့သည်.. ကားက မှတ်တိုင်မှာ တော်တော်ကြာကြာ ရပ်နေလေတော့ ကားပေါ်ကနေ ကျမ ဆိုင်ထဲကို ကောင်းကောင်းမြင်နိုင်နေသဖြင့် အိတ်ကလေးကို ကြည့်ရင်း ကျမ စဉ်းစားနေသည်.. ခုပဲ သွား ဆင်းဝယ်လိုက်ရင်ကောင်းမလား.. ထိုအိတ်ကိုလွယ်ပြီး နောက်နေ့ သူနှင့် တွေ့လျှင် သူက မျက်နှာထားမာမာဖြင့် ကျမကို ကြည့်တော့မည်.. "မဝယ်ပါနဲ့ဆို ဝယ်တယ်.. တော်တော် စကားနားထောင်တယ်ဟုတ်လား" .. သူ ပြောလာနိုင်မည့်စကားများနှင့် သူ့အသံကို ကြားယောင်မိပြန်တော့ ဆင်းဝယ်ချင်နေသည့် ကျမ ခြေထောက်များ တုံ့ဆိုင်းနေပြန်သည်..

ကျမ သူ့ကို ကြောက်နေသလား..
သူ စိတ်ဆိုးတာကို မလိုလားတာတော့ အမှန်ပဲ.. သို့သော် သူကတော့ ကျမ စိတ်ဆိုးမည်ကိုသော်လည်းကောင်း ကျမ စိတ်မကောင်းဖြစ်မည်ကိုသော်လည်းကောင်း နည်းနည်းမှ ထည့်စဉ်းစားသည့်ပုံ မပေါ်ဟု ပထမဆုံးအကြိမ် အလန့်တကြား တွေးမိလိုက်သည်.. ထိုအတွေးက ကျမတွင် ဖြစ်နေသည့် စိတ်မချမ်းမြေ့ခြင်း တော်တော်များများ၏ အဖြေလည်း ဖြစ်နေလိမ့်မည်ထင်၏.. သူနှင့် ကျမ၏ ချစ်သူသက်တမ်း ၃ နှစ်ကျော် ကြာလာချိန်တွင် ကျမသည် စိတ်အလိုမကျခြင်းများ၊ အားငယ်ဝမ်းနည်းခြင်းများ၊ သို့မဟုတ် စိတ်အတက်ကြွလွန်ခြင်းများကို တပြိုင်နက်ခံစားနေရတတ်သည်.. ကျမက အလုပ်၏ ဖိစီးမှုများကြောင့်ဟု ဇွတ်အတင်း အကြောင်းပြချက်ယူထားခဲ့သော်လည်း တကယ်တမ်း ထိုသို့ဖြစ်နေရသည့် အကြောင်းရင်းမှန်ကို ရှာဖွေဖို့ ကြောက်နေခြင်းလည်း ဖြစ်နိုင်သေးသည်.. တခါတရံ သိပ်စိတ်ပင်ပန်းလွန်းလာလျှင် သူနှင့် လမ်းခွဲလိုက်ဖို့ စဉ်းစားဖူးသော်လည်း ထိုအတွေးကို မတွေးကောင်းသော အရာတစ်ခုလိုပဲ စိတ်ထဲကနေ ဇွတ်အတင်းဖျောက်ဖျက်ပစ်လိုက်ရတတ်၏.. ကျမ သူ့ကို သိပ်ချစ်တာပါ.. သူ ကျမကို ချစ်မှန်းလည်း ကျမသိနေတာပါ..

အချင်းချင်း ချစ်စိတ်ရှိကြပေမယ့် အဆင်ပြေပြေ ပေါင်းစပ်လို့ မရသော အဖြစ်အပျက်ဟာ တကယ်ပဲ ရှိနေသလား.. ကျမ သူနဲ့ မဝေးချင်ဘူး.. ကျမ၏ မာနတွေ အတ္တတွေ ဘယ်လောက်ပဲ ထိခိုက်ပါစေဦးတော့.. သူ့ကြောင့် ကျမ ပျော်ရပါသည်.. ထိုအတွေးဖြင့်ပင် ကျမသည် ကျမတို့ကြားက ပြဿနာများကို စေ့စေ့သေချာ မတွေးဘဲ ကိုယ့်ကိုကိုယ် လှည့်စားနေမိသည်ပဲလား.. သူနှင့် လမ်းမခွဲချင်စိတ် တစ်ခုထဲနဲ့ ကျမ၏ သိစိတ်ကို လှည့်စားထားမိသည်လား.. တကယ်တမ်း သေချာတွေးကြည့်မည်ဆိုလျှင် သူသည် ကျမကို ချစ်သည်ထက် သူ့ကိုယ်သူသာ ပိုချစ်ခင်တတ်သူ တစ်ဦးအဖြစ် သိမှတ်ရုပ်လုံးပေါ်လာလေမလား.. ထိုအခါ သူ့အပေါ်ထားသည့် ကျမ၏ ချစ်စိတ်တို့ လျော့ပါး ပျောက်ကွယ်မလား.. အို - ထိုမျှ တွေးမိရုံနှင့်ပင် ကျမ စိတ်မှာ နာကျင်ရပါလေသည်..

ကျမသည် သိမှတ်မှုမရှိဘဲ ငေးမောနေရာကနေ ကျမ၏ ကျောပိုးအိတ်လေး ရှိရာဘက်သို့ လှည့်ကြည့်လိုက်မိသည်.. ချက်ချင်းပင် ကျမ မျက်မှောင်ကုပ်သွားရ၏.. ဆိုင်ထဲမှာ ကျမအရွယ် ကောင်လေး ၃ ယောက်.. ကျောပိုးအိတ်များကို ဟိုတစ်ခု သည်တစ်ခု ဖြုတ်ယူ ကြည့်နေကြသည်.. ဘုရားသိကြားမလို့ ကျမ၏ အိတ်ကလေးကို သူတို့ သဘောမတွေ့သွားပါစေနဲ့.. သို့သော် ကျမ ဆုတောင်း မပြည့်ပါ.. ကောင်လေးတစ်ယောက်က ကျမအိတ်ကလေးကို ဖြုတ်ယူခိုင်းနေပြီ.. အရောင်းစာရေး ကောင်မလေးက ချိတ်မှဖြုတ်ယူနေသည်ကို ကြည့်ရင်း ဖြုတ်လို့မရပါစေနဲ့လို့ အဓိပ္ပါယ်မဲ့ ဆန္ဒဖြစ်မိပြန်သည်.. ကောင်လေးက ကျောမှာလွယ်ကြည့်လိုက်၏.. သူ့ရှပ်အင်္ကျီနီနီလေးပေါ်မှာ ကျမ၏ အိတ်ကလေးသည် အဆင်ပြေလှပစွာ ကြည့်လို့ ကောင်းနေသည်.. ကျမ မနာလိုလိုက်တာ..

သူတို့က တန်းတော့ မဝယ်သေး.. သို့သော် အိတ်ကလေးကို ပြန်ချိတ်ဖို့လည်း မပေးသေးဘဲ ၃ လုံး ၄ လုံး ယှဉ်ရွေးနေဟန်ဖြင့် လက်မှာ ကိုင်ထားလျက်ရှိနေဆဲမှာပင် ကျမစီးသည့် ဘတ်စ်ကားက မှတ်တိုင်မှ ခွာလေသည်.. ကျမသည် သံယောဇဉ် မပြတ်နိုင်စွာ ခေါင်းကိုလည်လျက် လိုက်ကြည့်နေမိဆဲ.. မယူသွားကြပါစေနဲ့.. မဝယ်ပါစေနဲ့.. မနက်ဖြန် ဆိုင်ကိုရောက်လျှင်တော့ ကျမ ချစ်သူမည်မျှပင် တားမြစ်သည်ဖြစ်စေ ထိုအိတ်ကလေးကို ကျမ ဝယ်တော့မည်.. လကုန်ခါနီး ရက်မို့ ကျမလက်ထဲမှာ ပိုက်ဆံသိပ်များများစားစားတော့ မကျန်.. ၇ ထောင်တန် ကျောပိုးအိတ်ကို ဝယ်လိုက်လျှင် နောက်ကျန်သော ရက်များ၌ ကျမ အသုံးစရိတ် ကျပ်တည်းနိုင်သည်.. သူ မကြိုက်သောအိတ်ကို ဝယ်ခြင်းဖြင့် ပိုက်ဆံကုန်တာဖြစ်လို့ ချစ်သူဆီက ငွေကြေးဆိုင်ရာငဲ့ညှာမှုလည်း ရနိုင်ဖို့ မရှိပါ.. သို့သော် ထိုအိတ်ကလေးကို ထို ကောင်လေး ၃ ယောက်မဝယ်သဖြင့် ကျန်နေမည်ဆိုလျှင်တော့ မနက်ဖြန် ကျမ ဝယ်ကိုဝယ်တော့မည်.. ကျမလက်ထဲ မရောက်ခင်က စိတ်အေးချမ်းသာနေနိုင်သော်လည်း တပါးသူက ယူမည်ဆိုပြန်တော့လည်း ကျမ မရှုစိမ့်နိုင်တာအမှန်ပဲ..

ကားက ကွေ့လိုက်သဖြင့် ဆိုင်ကို မမြင်ရဘဲကွယ်သွားပြီ.. ကောင်လေး ၃ ယောက်က အိတ်ကလေးကို လက်မှကိုင်ထားဆဲ.. ဝယ်လိုက်တာတော့လည်း မဟုတ်သေး.. ဝယ်သလား မဝယ်သလား သိချင်စိတ်ဖြင့် ကျမ ကားပေါ်မှာပါလာသည်.. မနက်ဖြန်တော့ ဆိုင်ကိုသွားပြီး ကြည့်လိုက်လျှင် ထိုအဖြေကို သိရမှာအမှန်ပဲ.. သွားကြည့်ပြီးမှ မရှိတော့ဘူးဆိုလျှင်ကော.. စောစောတွေ့ပါလျက်နဲ့ ကြိုက်နှစ်သက်ပါလျက်နဲ့ မဝယ်လိုက်မိလေခြင်းလို့ ကျမ စိတ်ထဲမှာ နောင်တကို ခံစားရနိုင်သည်.. ကျမ ခံနိုင်ရည်ရှိသလား.. နောက်နေ့တွေမှာ ဆိုင်ရှေ့ကဖြတ်လျှင် လှည့်မကြည့်မိအောင် ကိုယ့်ကိုကိုယ် ထိန်းချုပ်လျက် နေလိုက်ရမလား.. နောက်ကြာလျှင် မေ့မေ့ပျောက်ပျောက်ဖြစ်သွားနိုင်မည်.. သို့သော် ကျမ စိတ်ကူးပြောင်းပြန်သည်.. ခံနိုင်ရည် ရှိသည်ဖြစ်စေ မရှိသည်ဖြစ်စေ.. ဘယ်လိုပဲဖြစ်ဖြစ် အဖြေမသိရဘဲ စိတ်ထဲမှာ တနုံ့နုံ့ဖြစ်နေရသည်ထက်စာလျှင် အဖြေကို ပြတ်ပြတ်သားသားရင်ဆိုင်လိုက်တာက ပိုကောင်းမည် ထင်သည်.. ကျမ၏ ချစ်သူဆက်ဆံရေးမှာလိုပါပဲ.. ဟုတ်သည်.. ကျမ သိရမှ ဖြစ်မည်..

နောက်တနေ့ညနေ သင်တန်းက အဆင်းမှာတော့ ကျမသည် စတိုးဆိုင်ထဲဝင်၍ ကျမ၏ ကျောပိုးအိတ်ကလေးရှိသေးသလားလို့ ရှာဖွေလိုက်ပါသည်..

Read More...

Summary only...

the volunteer

သင်္ကြန်တောင်ကြီးသွားတုန်းက ရွှေဘုန်းပွင့်တို့ မြစိမ်းတောင်တို့ တက်ဖြစ်တယ်..
လမ်းမှာ ဉာဏ်ပင်တောရ ခေါ်တဲ့ ဘုန်းကြီးကျောင်းလည်း ဝင်တော့
အလှူစာတွေဘာတွေ လှူ. ဘုန်းကြီးကန်တော့အပြီးမှာ အဲ့က ထမင်းကျွေးတယ်..
ထမင်းချက်နေတဲ့ လူတွေကို ကြည့်ပြီး သဘောကျလို့ ရိုက်လာဖြစ်ပါတယ်..
သူများတကာ စားသောက်ဖို့အတွက် ကိုယ်စွမ်းရှိသလောက် စေတနာအပြည့်နဲ့ ချက်ပြုတ်နေကြတဲ့လူတွေ..
ပင်ပန်းကြပါတယ်.. ဒါပေမယ့် ပျော်လည်းပျော်နေကြတယ်..

Read More...

Summary only...

စာလုံးပေါင်းတော့ မှန်စေချင်

ဒီပို့စ်ကို အရင် nangnyi [dot] net မှာ တင်ဖူးပါတယ်.. ခု အဲ့ဒါက hosting ပျက်ပြီး ပို့စ်တွေပျောက်ကုန်လို့ စက်ထဲသိမ်းထားတာလေးကို ပြန်တင်လိုက်တာပါ..

ခုဆိုရင် စာလုံးပေါင်းမှားတာတွေက နေရာတကာမှာ ဖြစ်နေပြီ.. ကြည့်ရအဆိုးဆုံးကတော့ အများပြည်သူမြင်သာတဲ့နေရာမှာ ထားတဲ့ ဆိုင်းဘုတ်တွေမှာ စာလုံးပေါင်းမှားတာ.. ပြီးတော့ မြဝတီနဲ့ မြန်မာ့အသံ စတဲ့ရုပ်သံလိုင်းတွေမှာ စာလုံးပေါင်းမှားတာ.. တခါတလေ အစိုးရထုတ်သတင်းစာတွေမှာတောင် စာလုံးပေါင်းအမှားတွေမြင်နေရပြီ.. ခုနောက်ပိုင်း အများဆုံးမှားတာကတော့ "မှု" ကို "မှု့"လို့ ရေးတာ.. ဟထိုးနဲ့ တချောင်းငင် ပါပြီးသား စာလုံးမှာ အောက်ကမြင့် ထပ်ထည့်စရာမှ မလိုဘဲ.. ဒါပေမယ့် ခုနေရာတကာမှာ မှု အမှားတွေမြင်နေရပြီ.. အမြင်ကပ်ပြီး စိတ်မချမ်းသာလိုက်တာ..

စာလုံးပေါင်းမှားတာဟာ စာဖတ်နည်းလို့လို့ ထင်တယ်.. စာလုံးပေါင်းအမှန်ကို များများဖတ်ပြီးသားလူဟာ တော်ရုံတန်ရုံနဲ့တော့ စာလုံးပေါင်းမမှားဘူး.. ဒါပေမယ့် ခုနောက်ပိုင်း လူငယ်တွေကျပြန်တော့ စာလုံးပေါင်းအမှားတွေကိုပဲ များများဖတ်နေကြရလို့လားတော့မသိဘူး.. စာလုံးပေါင်းသတ်ပုံကို ဂရုလည်းမစိုက်ကြတော့ဘူး.. အမှားလည်းသိပ်များလာတာပဲ.. ပြီးတော့ သတ်ပုံမှားတာ ဘာဖြစ်လဲ.. ဆိုလိုရင်း သိရင်ပြီးတာပဲ ရယ်လို့ ဂရုတစိုက်မပြင်ကြတာတွေက ပိုဆိုးပါတယ်.. ဆိုလိုရင်းကို ခုသိနေပေမယ့် အမှားတွေဖတ်ပါများပြီး အမှန်ထင်လာတဲ့အခါမှာ ဆိုလိုရင်းပါ ပျောက်သွားနိုင်ပါတယ်.. သတ်ပုံဆိုတာ စည်းစနစ်တစ်ခုပါ.. တစ်ယောက်တစ်မျိုး ထင်ရာပေါင်းနေရင် အငြင်းပွားစရာတွေ အများကြီးဖြစ်လာမှာစိုးလို့ သတ်မှတ်ပေးထားတဲ့ စနစ်ပါ.. လိုက်နာစောင့်ထိန်းသင့်ပါတယ်..

ဘလော့ဂါတွေဟာ စာရေးဆရာတွေ မဟုတ်ဘူး လို့ပြောကြပေမယ့် ဘလော့ဂါတွေဟာ စာရေးကြတဲ့လူတွေပါပဲ.. ပြီးတော့ စာလည်းဖတ်ကြတဲ့ လူတွေ.. ဒီဘက်ခေတ်မှာ အွန်လိုင်းစာပေတွေ ပေါ်လာတော့ ပုံမှန်စာအုပ်တွေကို ဖတ်အားကျသွားကြပြီ.. နိုင်ငံခြားရောက်နေတဲ့ လူတွေဆိုပိုဆိုးမယ်.. အွန်လိုင်းကစာတွေ ဘလော့တွေ ဖိုရမ်တွေ ဒါတွေနဲ့ပဲ ကျေနပ်နေရမှာ.. အဲ့ဒိမှာ စာလုံးပေါင်း အမှားပြဿနာက အရမ်းကိုကြီးကျယ်သွားပြီထင်တယ်.. ဟိုဘလော့ဖတ်လည်း သတ်ပုံမှား.. ဒီဘလော့ဖတ်လည်း သတ်ပုံမှားနဲ့ဆိုရင် ဖတ်တဲ့လူကိုယ်တိုင်လည်း သတ်ပုံတွေ အမှတ်မှားလာတော့မယ်.. ထင်သလိုပေါင်းတော့ ရေးတော့မယ်.. အဲ့ဒါတွေကို နောက်ထပ်ဖတ်တဲ့လူက တခါမှား.. နောက်ထပ်လူတွေ မှား မှား.. ခု ၄ နှစ် ၅ နှစ်အရွယ်ကလေးတွေ အသက်ကြီးလာတဲ့အခါ "သတ်ဗုံဒွေကို တရောက်တမြိုးဆီ ပေါင်းနေကြရင် ခက်ပီ"..

ခေတ်ပညာတွေတတ်ပြီး နည်းပညာခေတ်ကြီးမှာနေတယ်ဆိုပြီး ကိုယ့်ဘာသာစကားကိုတောင် ကိုယ် မှန်အောင်မပေါင်းနိုင်တဲ့အခါ ရှက်ဖို့တော့ ကောင်းပါတယ်.. တချို့ကပြောသေးတယ် "သတ်ပုံအမှန်သိပါတယ်.. လောကြီးပြီးစာရိုက်တဲ့အခါ typing error ပါ" တဲ့.. အိုခေ.. တိုက်ပင်းအယ်ရာဆိုလည်း တစ်လုံးတလေက ခွင့်လွှတ်နိုင်ပါသေးတယ်.. ပြီးတော့ ချက်တင်မှာ မှားတာက သိပ်အရေးမကြီးပေမယ့် ဘလော့တွေ ဖိုရမ်တွေလို အေးအေးဆေးဆေးစာရိုက်လုိ့ရတဲ့နေရာမှာတော့ သေချာပြင်ဆင်ပြီးမှ ရေးသင့်တယ်မထင်ဘူးလား.. (ဒါတောင် ချက်တင်မှာ ရိုက်တဲ့ စာလုံးပေါင်းတွေက တကယ်တမ်းစာတွေရေးတဲ့အခါ အကျင့်လာလာပါနေတတ်သေးတယ်).. နန်းညီဆိုရင်လည်း များသောအားဖြင့် ချက်တင်မှာစကားပြောတဲ့အခါ "ပြီ" ကို ရိုက်လို့ စိတ်မရှည်ဘူးဆိုပြီး "ပီ" လို့ပဲ ရိုက်ရိုက်နေတာ.. နောက်တော့ စာတွေတကယ်ရေးရင်တောင် ရရစ်ထည့်တဲ့ အကျင့်မရှိတော့ စာလုံပေါင်းတွေမှားတယ်.. အဲ့ဒါ အခုဆို ချက်တင်မှာလည်း သေချာစာလုံးပေါင်းပြီး ရေးနေရတယ်..

ပြီးတော့ စာလုံးပေါင်းအမှန်သိရဲ့သားနဲ့ ပြီးလွယ်စီးလွယ်ရိုက်တတ်တဲ့လူတွေ.. ဥပမာ..ရရစ်ဆိုပါစို့.. သူက အမျိုးအစားတွေ အများကြီးမဟုတ်လား.. ပ တို့ မ တို့နဲ့ တွဲရတဲ့ ရရစ်က J တစ်လုံးထဲရိုက်ရတဲ့ "ြ  " ဒါမျိုး.. က တို့ တ တို့မှာသုံးတာက shift+m "ြ -   " ရိုက်ရမယ့်နေရာ.. မ တွေ ပ တွေကိုပဲ လုံးကြီးတင်ထည့်ချင်ရင် shift+n "ြ   " .. က တွေ တ တွေအတွက် လုံးကြီးတင်ထည့်မယ့် ရရစ်က shift+b "ြ    " .. အဲလိုအမျိုးမျိုးကွဲပြားနေတဲ့ ရေးထုံးရေးနည်းတွေကို တိုက်ပင်ရိုက်ရတာ စိတ်မရှည်တဲ့အခါ ဘာလာလာြ    J တစ်လုံးပဲနှိပ်ပြီးသုံးတဲ့လူလည်းရှိရဲ့..( မြ.. ကြ.. တြ.. ပြ.. ) ဘယ်လိုမှ ကြည့်မကောင်းဘူးလေ..

ပြီးတော့ အောက်ကမြင့် ဆိုရင်လည်း.. (ညံ့.. တဲ့.. မဲ့) တွေအတွက်က ရိုးရိုး h တစ်လုံးထဲရိုက်ရတာ.. (မှဲ့.. မန့်.. ခန့်) လိုဟာမျိုးတွေက shift+Y ကိုသုံးတာ.. (ချို့.. ရို့..) ဆိုတာမျိုးတွေကျတော့ shift+u ကိုသုံးတာ.. တချို့က အောက်ကမြင့်ကို အဲလိုတွေရှာရစိတ်မရှည်ဘူးဆိုပြီး အောက်ဆုံးတန်းနားက (.) ဒီအစက်ကိုသုံးပြန်တော့လည်း သူတို့ရေးတဲ့စာတွေက ဒီလိုဖြစ်နေပြန်ရော (သူအဲလိုပြောလိုက်တော. သူမက ခပ်မဲ.မဲ. ပြုံးလေသတဲ.) ဆိုပြီးဖြစ်ကုန်ရော.. ဘယ်လိုလုပ်ဖတ်ရတာ အဆင်ပြေပါတော့မလဲ..

မြန်မာစာမှာ စာကို အစုလိုက် အစုလိုက် အဖြတ်အတောက်မှန်မှ စာဖတ်ရတာ ချောပါတယ်.. အဲ့လို စာစုလိုက် စာစုလိုက် ဖြတ်တတ်ဖို့က ငယ်ငယ်ကတည်းက ကျင့်လာရမှာ.. ကျောင်းက ဖတ်စာအုပ်တွေကိုကြည့်လေ.. စာအဖြတ်အတောက်လေးတွေ ဘယ်လိုဖြတ်ပေးထားလဲ.. ကိုယ်က စာရေးတဲ့အခါမှာလည်း အဲလိုပဲ စာကို အစုလိုက်ကလေးတွေ ခြားခြားပြီးရေးတတ်အောင် ကျင့်ထားသင့်တာ.. တချို့က စာရေးရင် ၃ လုံးခြားတစ်ခါ space ခြားတယ်.. ဥပမာ (စာကို အစုလိုက် အပိုဒ်လိုက် စနစ်ကျစွာ ရေးပါ) ဆိုတဲ့ စာကြောင်းပဲ ထားပါတော့.. သူက ဒီလိုရေးတယ် (စာကိုအ စုလိုက်အ ပိုဒ်လိုက်စ နစ်ကျစွာ ရေးပါ).. ဘယ်လိုမှကို အဆင်မပြေဘူး.. သူများတွေ စာရေးရင် ခြားထားတာတွေ့လို့ သူလည်း လိုက်ပြီး space သုံးတာပဲရှိတယ်.. ဘာကြောင့် ခြားတယ်ဆိုတာကို သူနားမလည်ဘူး.. အဲဒီလိုလူမျိုးက ရှားတော့ရှားပါတယ်..

နောက်ပြီး တကယ်တမ်းပြောမယ်ဆိုရင် typing လုပ်တဲ့အခါ လိုက်နာရတဲ့စည်းကမ်းတွေ အများကြီးရှိသေးတယ်.. (နန်းညီက ၄ တန်းကတည်းက အမေ့စာစီစာရိုက်လုပ်ငန်းမှာ ကူပေးခဲ့တော့ စာရိုက်နည်းကို အတော်စနစ်ကျခဲ့တယ်လို့ထင်ပါတယ်).. ဥပမာ.. စာတစ်ကြောင်းပြီးရင် ပုဒ်မချရတယ်.. ပုဒ်မ ချတဲ့အခါ နောက်ဆုံးစာလုံးနဲ့ ကပ်ချရတယ်.. နောက်ဝါကျ တစ်ကြောင်းစမယ်ဆိုရင် ပုဒ်မနောက်မှာ space ခြားပြီးမှ စရိုက်ရတယ်.. ဘာကြောင့် အဲလိုလုပ်တာလဲ.. print ထုတ်တဲ့အခါ ဒါမှမဟုတ်လည်း စာတွေတန်းစီရိုက်တဲ့အခါ ဝါကျနောက်ဆုံးစာလုံးနဲ့ ပုဒ်မ ကပ်နေမှ spacing မဆန့်လို့ ကွန်ပျူတာက အောက်တစ်ကြောင်းဆင်းပေးရင် ပုဒ်မက ကပ်ပါလာမယ်.. နောက်တစ်ကြောင်းနဲ့ ရှေ့ပုဒ်မ space ခြားထားမှ အောက်တကြောင်းဆင်းသွားတဲ့အခါ စာကြောင်းသပ်သပ်လေးတွေ ဆင်းမယ်..
ခု နန်းညီကတော့ ပုဒ်မ မချဘဲ အစက်အစက်တွေသုံးပြီး စာကိုဆုံးတယ်.. တကယ်ဆို အဲဒီလိုလည်း မလုပ်သင့်ဘူးထင်တယ်.. ဒါပေမယ့် ထားပါဦးလေ..

ပြောချင်တာက.. တမင် အသံထွက်အတိုင်း လိုချင်လို့ စာလုံးပေါင်းသတ်ပုံစံနှုန်းကို ချော်ထွက်ပြီးသုံးတာကလွဲရင် သတ်ပုံတွေကို ဂရုတစိုက် မှန်အောင်ရေးသင့်တယ်လို့ထင်တယ်ဆိုတဲ့အကြောင်းပါ.. စာစီစာရိုက်စည်းကမ်းတွေကိုလည်း တတ်နိုင်သလောက် လိုက်နာပေးလိုက်ရတာက ဘာမှ နစ်နာမှုမဖြစ်သွားဘူးထင်ပါတယ်.. ဖတ်ရတဲ့လူ အဆင်ချောပြီး မျက်စိထဲလည်း လှတာပေါ့.. စာလုံးပေါင်းသတ်ပုံကျမ်းဆိုတာ လူတိုင်းကြည့်ဖူးသင့်တဲ့ စာအုပ်ပါ.. စာလုံးပေါင်း မသေချာတဲ့အခါ စာအုပ်ပြေးလှန်လိုက်ရတာ ပင်ပန်းတယ်ဆိုပြီး ထင်သလိုပေါင်းလိုက်တဲ့အခါ စာကိုဖတ်ရတဲ့ နောက်လူတွေအတွက် မကောင်းပါဘူး.. စာလုံးပေါင်းကို မှားနေမှန်းလည်းသိပြီး မှန်အောင်လည်းကြိုးစားမှတ်ထားသင့်ပါတယ်..

ခုဆို [http://myanmarwords.pikay.org/] လိုမျိုး စာလုံးပေါင်းသတ်ပုံကျမ်း ဝဘ်ဆိုက်တွေလည်းရှိနေတာပဲ.. facebook မှာလည်း စာလုံးပေါင်းသတ်ပုံအမှန်ပြင်ပေးရေးအဖွဲ့လား ဘာလား.. ရှိတယ်.. နန်းညီဆိုရင်လည်း မြင်သလောက် တွေ့သလောက် သတ်ပုံမှားတွေ စာရိုက်တဲ့စနစ်အမှားတွေကို ကိုယ်သိသလောက် ပြင်ပေးပြောပေးပါတယ်.. မြန်မာလူမျိုးတစ်ယောက်အနေနဲ့ မြန်မာစာသတ်ပုံမှန်အောင်လုပ်ဖို့ တာဝန်ရှိတယ်လို့ ယူဆလို့ပါ..

Read More...

Summary only...

Jason

well .. u all know about "token" already ..rite?
token the red Indian girl .. check here if u don't know [http://nangnyi.blogspot.com/2011/06/token.html]
here is Jason, the cow boy..
he's from Mexico, came here to colonize the land of Indians.
but when his cold-blooded heart saw this cute little indian girl..
what will happen next ??

 (see the rest on next cartoon) =P

Read More...

Summary only...

အတွေးချာလည်

ခုတလော ဟိုတွေးဒီတွေး တွေးနေမိတာ.. မိန်းမတွေရော ယောက်ျားတွေရောကို စိတ်ဓာတ်ပြည့်ဝစေချင်တဲ့အကြောင်းပါ.. ယောက်ျားမို့ စိတ်ဓာတ်ပြည့်ဝရမယ် သဘောထားကြီးရမယ်.. မိန်းမဆိုတာ စိတ်ဓာတ်သေးသိမ်တယ်လို့ သတ်မှတ်ခံရတာကိုလည်း မနှစ်သက်နိုင်ပါဘူး.. စိတ်ထားပြည့်ဝတဲ့ မိန်းမတွေ များသလို မိုက်ရိုင်းယုတ်ညံ့တဲ့ ယောက်ျားတွေလည်းရှိတာပါပဲလေ.. ကိုယ်ကတော့ မိန်းမ ယောက်ျားရယ် မခွဲခြားတတ်.. လူလို့ပဲ တွေးပါတယ်.. တကယ်ပါ.. ဒီလို ရောက်တတ်ရာရာတွေ တွေးဖြစ်တာက ညတစ်ည ကြုံရတဲ့အကြောင်းတစ်ခုကနေ စပါတယ်..

ဟိုနေ့က အိဖူးနဲ့ နန်းညီ နှစ်ယောက်သား ရွှေဂုံတိုင် လင့်လမ်း မှတ်တိုင်ကနေ coffee circle ကို လမ်းလျှောက်သွားကြတယ်.. ရန်ကုန်က လူတွေကတော့ သိကြမှာပေါ့.. coffee circle ဆိုတဲ့ ဆိုင်က မှတ်တိုင် တဝေးတလံကြီး နှစ်ခုကြားထဲမှာဆိုတော့ တက္ကသီလာမှ ငှားမစီးရင် ရှေ့တည့်တည့်ရောက်ဖို့က ခဲယဉ်းတယ်လေ.. အဲ့ဒိနေ့ညကတော့ ည ၇ နာရီခွဲလောက်.. နေလည်းမပူ မိုးလည်းမရွာ အေးအေးလူလူဆိုပြီး နှစ်ယောက်သား လျှောက်ကြတာ..

မှတ်တိုင်ဘက်ခြမ်း ကားလမ်းကနေ ဟိုဘက်ကားလမ်းကို ကူးလိုက်တဲ့အခါ အဲဒိဘက် ပလက်ဖောင်း ခပ်မှောင်မှောင်အရိပ်ထဲမှာ လူ ၃ ယောက် ၄ ယောက်လောက် ရှိနေတာ အနားကပ်မှ သတိထားမိတယ်.. အော် - ဘာဖြစ်လဲပေါ့.. သူတို့ရှိလည်း ကိုယ်လျှောက်စရာ ရှိတဲ့လမ်း လျှောက်မယ်ဆိုပြီး..

ဒါပေမယ့် အဲ့လူတွေက ကိုယ်တို့ ဖြတ်လည်းသွားရော ပါးစပ်တွေက အငြိမ်မနေ ပေါက်ကရတွေ ပြောပါတော့တယ်.. ပြီးတော့ နောက်နား ခပ်လှမ်းလှမ်းကနေ လိုက်လျှောက်လာကြတယ်.. ရိုးအီနေပြီပဲ ပြောရမလား.. ဒီအနေအထားမျိုး ဖြေရှင်းတတ်တယ်ပဲ ပြောရမလား.. မိန်းကလေးတွေကို ပေါက်ကရ စ နောက်တတ်သော ယောက်ျားအများအပြားကို ခဏခဏကြုံနေရတော့ နှစ်ယောက်သား အထူးအထွေတော့ မတုန်လှုပ်မိ.. ဒါပေမယ့် စိတ်အနှောင့်အယှက်တော့ ဖြစ်တာပေါ့လေ.. အဲလိုနဲ့ ဆက်လျှောက်လာရင်း သူတို့နဲ့ သိပ်တောင် မဝေးသေးခင် မျက်နှာချင်းဆိုင်ကနေ ကောင်လေး ၄ ယောက် ပလက်ဖောင်းပြည့် စီတန်းပြီး လျှောက်လာနေပြန်ရော..

နှစ်ယောက်သားက ခုနကတည်းက စိတ်နည်းနည်း ခု လာတော့ ရှောင်ဖို့ထက်.. မရှောင်ဘူးဟာ နင်တို့ဖယ် ဆိုတဲ့ မျက်နှာပေး မျက်နှာတင်းတင်းကြီးတွေနဲ့ သူတို့ ကြားကပဲ ဖြတ်ဖို့ ကြံရွယ်ပြီး ဆက်လျှောက်လာခဲ့တယ်.. ဒါပေမယ့် အနားကပ်မှ မမျှော်လင့်ပဲ.. "အမ တို့ ပါလား.. ဘယ်သွားမလို့လဲ"လို့ တရင်းတနှီးကြီး နှုတ်ဆက်သံကြားလို့ မော့ကြည့်တော့မှ .. ကိုယ်တို့ တိုက် အပေါ်ထပ်မှာနေတဲ့ ကောင်လေးဖြစ်နေတယ်.. အသက် ၂၀ လောက်ကောင်လေး.. သူငယ်ချင်း ၃ ယောက်နဲ့.. ကိုယ်တို့ကို မြင်ရင် အရင်က နှုတ်ဆက်လေ့ မရှိပေမယ့် ခုတော့ ညဘက်လည်းဖြစ်နေ.. သူ့ သူငယ်ချင်း ကောင်လေးတွေနဲ့လည်းဖြစ်နေ.. နောက်ဘက်နားက ကပ်ပါလာတဲ့ ယောက်ျားတွေလည်းမြင်တော့ ကူညီတဲ့အနေနဲ့လို့ပဲ ပြောရမလား.. တရင်းတနှီး လှမ်းနှုတ်ဆက်လိုက်တဲ့ စိတ်ဓာတ်ကလေးက ချစ်စရာကောင်းလိုက်တာ..

ကိုယ်တို့လည်း ပြန်ပြုံးပြလိုက်ပြီး တမင်ပဲ ခဏရပ်လိုက်.. "ကော်ဖီဆိုင်သွားမလို့.. အောင်ကိုလွင် ဘယ်က ပြန်လာတာလဲ"လို့ မေး.. သူ့ ဘေးက သူငယ်ချင်းကောင်လေးတွေကပါ ရည်ရည်မွန်မွန်လေးတွေ ပြုံးလို့.. ကိုယ်တို့နဲ့ ခပ်လှမ်းလှမ်းက ပါလာတဲ့ယောက်ျားတွေ ကြားမှာ သူတို့ ၄ ယောက်က ကာပြီး ရပ်လိုက်ကြသေးတယ်.. ဟိုလူတွေ နဂိုထိုင်နေတဲ့ နေရာမှာပဲ ပြန်ထိုင်နေတာတွေ့တော့မှ သူတို့လည်း နှုတ်ဆက်ပြီး ဆက်လျှောက်သွားလေရဲ့.. အိဖူးနဲ့ ကိုယ် .. စိတ်လက်ကြည်သာစွာ ဆက်ပြီး လမ်းလျှောက်လာနိုင်တာ.. ကျေးဇူးတင်စရာ.. သူ့အတွက်လည်း အပန်းမကြီးပေမယ့် အားလုံးစိတ်ကျေနပ်စရာ ဖြစ်သွားရတာ.. တခါတလေ ကိုယ့်ဘက်က အမှတ်မထင် ကူညီလိုက်တာဟာ သူတဖက်သားအပေါ် အများကြီး အထောက်အကူဖြစ်ပါတယ်.. ကူညီဖို့ ဝန်မလေးပါနဲ့..

လမ်းဆက်လျှောက်ရင်း တွေးမိလာပြန်တာက.. တစ်ရက် ကိုယ်ရယ် မထိုက်ရယ် မဖြူရယ် မိန်းကလေး ၃ ယောက်ထဲ ထိုင်နေရာကို အမူးသမားတစ်ယောက် လာပြီး ရစ်နေတဲ့အကြောင်း.. ခပ်လှမ်းလှမ်းက ယောက်ျားလေးတစ်အုပ်ဟာ သူတို့နဲ့ မဆိုင်သလို မျက်စိကြောင်တောင်နဲ့ ကြည့်နေနိုင်တာ အံ့သြခဲ့ရတဲ့အကြောင်း.. ကူညီဖို့ ရှက်တာလား .. ကူညီဖို့ စိတ်ကူးကိုမရှိတာလား.. ကြောင်တယ်ထင်တာလား.. ဘာလဲမသိလို့.. အဲ့ဒါတွေ တွေးနေခဲ့တယ်..

ပြီးတော့ ကိုယ်တိုင် ကြားရတဲ့ အဖြစ်အပျက်တစ်ခု.. ယောက်ျားကြီး ၆ ယောက်က .. ကိုယ်ခန္ဓာကို ရင်းပြီး အလုပ်လုပ်စားတဲ့ ကောင်မလေးတစ်ယောက်ကို အခကြေးငွေ ၈ ထောင် မပေးဘဲ ကားပေါ်က တွန်းချတဲ့ အဖြစ်အပျက်တစ်ခု.. ကောင်မလေးက သက်ဆိုင်ရာကို တိုင်တဲ့အခါ.. (ကျမ ဒါနဲ့ လုပ်စားတယ်.. မှန်ပါတယ်.. ကျမ မရှက်ပါဘူး.. ဒါနဲ့ မိဘကို ရှာကျွေးနေတာပါ.. ခုက ငွေလေး ၈ ထောင်ကို မပေးဘဲ ကားပေါ်ကပါ တွန်းချလို့ တိုင်တာပါ) လို့ ပြောတဲ့ အဖြစ်အပျက်ပေါ့..

ပညာနိမ့်တာ.. ငွေကြေးနိမ့်ပါးတာ.. လူနေမှု နိမ့်တာတွေထက် .. စိတ်ဓာတ်နိမ့်တာက ပိုဆိုးပါတယ်..
စိတ်ဓာတ်နိမ့်တာဟာ ပညာနိမ့်တာနဲ့လည်း သက်ဆိုင်တယ်ယူဆပါတယ်.. ခုခေတ်ကျတော့.. ပညာနိမ့်တာဟာ ငွေကြေးနိမ့်တာနဲ့လည်း သက်ဆိုင်လာပြီထင်ပါရဲ့..

ဟိုတွေးဒီတွေးနဲ့ လုံးလည်ချာလည်လိုက်လာ.. တွေးမဆုံးအောင် တွေးရတာ အတော်တော့ ပျော်စရာကောင်းပါရဲ့.. တွေးမိသမျှလေးတွေ လျှောက်ဖမ်းရေးလိုက်တာ.. မဟုတ်ရင် ကိုယ့်ဘာကိုယ် ဘယ်နေ့က ဘာတွေးတယ်တောင် သိတော့မယ်မဟုတ်.. တစ်ယောက်နှစ်ယောက်လောက် ဆက်တွေးပြီး လုံးချာလိုက်နေမယ်ဆိုလည်း ဝမ်းသာစရာပေါ့..

Read More...

Summary only...