အပြန်

 

ကားပြတင်းအပြင်သို့ လှမ်းကြည့်လိုက်တိုင်း အမှောင်ကိုသာ မြင်နေရပြီး တချက်တချက်မှသာ မီးရောင်လေးတစ်ခုတလေ ပြူထွက်လာတတ်သော ဒီလမ်းမကြီးကို သူ ဘယ်တုန်းကမှ မနှစ်သက်ခဲ့ဖူးသော်လည်း အခုအခါမှာတော့ ဒီလမ်းမကြီး ခေါ်ဆောင်ရာ၏ အဆုံးသတ်သည် မေမေဖြစ်နေပြန်တော့ ဒီလမ်းမကိုပဲ နှစ်သက်မြတ်နိုးစိတ် ဖြစ်ပေါ်ရပြန်သည်..

အမှောင်ကို သူမုန်းသည်.. မနှစ်သက်နိုင်.. အဘယ်ကြောင့်ဆိုသော် အမှောင်ထဲမှာ သူ၏ နာကျင်မှုများ အရှုံးများ မေ့ပစ်ချင်လိုသည့် မှတ်ဥာဏ်တချို့တို့ကို ဖုံးကွယ်သိမ်းဆည်းထားခဲ့ဖူးပြီး ထိုအရာတို့ကလည်း အမှောင်ထဲမှ ပြန်လည်တိုးထွက်လာနိုင်ဖို့ အမြဲတစေကြိုးစားနေလို့ပဲ ဖြစ်လိမ့်မည်..

အခုတော့ ဒါတွေကို သူကြောက်စရာမလိုတော့.. မေမေ့ဆီ သူပြန်နေပြီ.. မေမေ၏ သူ့အပေါ်ထားသော အချစ်မေတ္တာတရားတို့ဖြင့် အမြဲလင်းချင်းနေတတ်ပြီး သန့်ရှင်းသပ်ရပ် မွှေးကြိုင်သည့် အိမ်ကလေးသို့ သူပြန်နေပြီ.. မည်သည့် ဘဝရပ်တည်ချက်မျိုးကို ရွေးချယ်မိသည်ဖြစ်စေ နောင်တမရတတ်ခဲ့သော လူတို့သည်လည်း နောက်ဆုံးမှာတော့ ငြီးငွေ့စိတ်ပျက်ခြင်းများဖြင့် အမေ့အိမ်ကိုသာတမ်းတတ်လေသလား..

ချိုသာရွှင်ပြစွာ ရယ်မောတတ်ပြီး သူ ပြောသမျှစကားတို့ကို အလေးအနက်နားထောင်တတ်သော မေမေ၏ အပြုံးတို့ကို မြင်ယောင်လာလေလေ အိမ်သို့ မြန်မြန်ရောက်ချင်လာလေဖြစ်ပြီး ဤလမ်းမကြီးက မဆုံးနိုင်တော့ဘူးလားလို့ ငြူစူချင်လာ၏.. သူက အလိုမကျလျှင် ငြူစူတတ်သည်.. အလုပ်များနေတုန်း မေမေဖုန်းဆက်လျှင် ငြူစူချင်၏.. အဆင်မပြေနေတုန်း လှူဖို့တန်းဖို့ မေမေ လှမ်းသတိပေးလျှင် ငြူစူချင်၏.. တခါတလေအိမ်ပြန်လာပါဦးလားလို့ မေမေ တောင်းဆိုလျှင် လူမှုရေးကိစ္စ သိပ်များလွန်းသော သူက ငြူစူချင်၏.. တကယ်တော့လည်း သူက မေမေ့အတွက် သားကောင်းတစ်ယောက်တော့ မဟုတ်ခဲ့ဘူးထင်သည်.. ဒါမှမဟုတ် မိဘကို ငွေကြေးထောက်ပံ့နိုင်ပြီး မျက်ရည်ကျအောင် မလုပ်မိဘဲ မိဘ ဂုဏ်ယူစရာ အရည်အချင်းတို့ရှိလျှင် သားကောင်းဖြစ်သည်လား.. သေချာမဝေခွဲတတ်သော်လည်း မေမေကတော့ သူ ဘာလုပ်လုပ် အပြုံးဖြင့် ဂုဏ်ယူမြဲပင်..

မိဘအိမ်မှာ သူ ဘာလုပ်လုပ် ဘယ်လိုနေနေ ဖေဖေရော မေမေပါ သူ့ကို မငြိုငြင်ကြ.. ဟန်ဆောင်နေစရာမလို အားတင်းစရာမလို လိမ်ညာလှည့်ဖျားဖို့မလို.. သူသည် ပကတိသူအဖြစ်နှင့် ရှင်သန်နေထိုင်နိုင်သည်.. သူ အမှန်တကယ်ပိုင်ဆိုင်သော သူနေထိုင်သည့် အ်ိမ်မဟုတ်သော်လည်း သစ်ပင်များဖြင့် အုံ့ဆိုင်းအေးမြသော ထိုအိမ်မှာဆိုရင်တော့ နှစ်နှစ်ခြိုက်ခြိုက် အိပ်ပျော်တတ်လေသည်.. တခါတလေ မိဘနှင့် စကားများ ရန်ဖြစ်ရတတ်သော်လည်း ထို အသေးအဖွဲပြဿနာလေးများကပင်လျှင် ပျော်စရာ အမှတ်တရတို့ကိုပေးတတ်ကာ နောင်တချိန်ကျတော့ သူတို့အားလုံးကို ရယ်မောစေလိမ့်မည်ထင်သည်.. နာကျင်ရတာခြင်းတူတူ ပြင်ပလောကမှ နာကျင်စရာများက အိမ်က နာကျင်မှုများနှင့်မတူ..

သူသည် အိမ်အကြောင်း မိဘတို့အကြောင်းတွေးနေရင်း မျက်ရည်ဝဲသော မျက်လုံးတို့နှင့် နှုတ်ခမ်းကတော့ ပြုံးမိနေသည်.. ချစ်ခြင်းတရားတို့ဆီ ဦးတည်နေသော လူတစ်ယောက်၏ စိတ်နှလုံးသည် သည်မျှနွေးထွေးချိုမြိန်တတ်သည်ကို သူဘာလို့ စောစောမသိခဲ့တာပါလိမ့်.. အခါပေါင်းများစွာ သူ အိမ်သို့ ပြန်ဖူးသော်လည်း ဒီတခါလောက် အိမ်ကိုတမ်းတစိတ်မပေါ်ခဲ့ဘဲ လေးလံသောတာဝန်များ အတွေးများ စိတ်ညစ်ညူးစရာများကို သယ်ကာ ပြန်တတ်ခဲ့သည်.. သူ မိုက်မဲခဲ့သည် ထင်တာပဲ.. အိမ်နှင့်ခွဲကာ အဝေးတနေရာမှာ ရှိနေရခြင်းအတွက် သူကပဲ မိသားစုအတွက် အနစ်နာခံ တာဝန်ထမ်းဆောင်နေရသလိုလို ဖြေဖျောက်ကာ လှည့်စားတွေးတောတတ်ခြင်းသည် အိမ်နှင့်ဝေးခြင်းအတွက် ကိုယ့်ကိုယ်ကိုယ် ပြန်ပေးသော ဆင်ခြေများသာဖြစ်ကြောင်း သူ စောစောသတိထားခဲ့မိဖို့ ကောင်းပါသည်.. သူ တုံးအခဲ့တာအမှန်ပဲ..



အခုတော့ သူ အိမ်ပြန်နေပြီ.. ရှည်လျားကာ ပျင်းရိစရာ ဤလမ်းမကြီးသည် မဆုံးနိုင်တော့ဘူးလားဟု ထင်ရသော်လည်း တချိန်ချိန်မှာတော့ နွေးထွေးသည့် အမြဲကြိုဆိုနေတတ်သော မိဘအိမ်သို့ သူ့ကို ပို့ဆောင်ပေးလိမ့်မည်..

သူ မေမေ့ဆီသို့ ပြန်နေပါပြီ..